ທີມງານ “ໜຸ່ມໂກສິນ” ຈະສານຕໍ່ວຽກງານການບັນເທີງຂອງອາຈານ ກິດາວເພັດ ໜູຫ່ວງ ຕໍ່ໄປ

ວັນທີ 27/4/2020 ທີ່ນະຄອນຫຼວງວຽງຈັນ ຈາກເພຈທີມງານ “ໜຸ່ມໂກສິນ” ໄດ້ໂພສວ່າ “ທີມງານນັກດົນຕຣີ ໜຸ່ມໂກສິນ ຈົ່ງສານຕໍ່ໄປໃນເສັ້ນທາງທີ່ເພິ່ນໃດ້ປູໄວ້ໃຫ້. ຂໍໃຫ້ດວງວິນຍານ ຫົວໜ້າຈົ່ງຂື້ນສະຫວັນຊັ້ນຟ້າ ພວກເຮົາຈະຈົດຈຳສິ່ງທີ່ດີງາມໄວ້ຕະຫຼອດໄປ.” ຂ່າວກ່ອນໜ້ານີ້: ມື້ນີ້ເປັນມື້ສຸດທ້າຍທີ່ຄອບຄົວ, ມິດຮັກແຟນເພງທົ່ວປະເທດຮ່ວມສົ່ງລາຊາເພງລຸກທຸ່ງລາວ ກິດາວເພັດ ໜູຫ່ວງຂຶ້ນສູ່ສະຫວັນຊັ້ນຟ້າ ເຖິງຈະເປັນໄລຍະທີ່ປະເທດເຮົາຢູ່ລະຫວ່າງການເຝົ້າລະວັງຂອງພະຍາດໂຄວິດ 19 ກໍ່ຄືການຮັກສາໄລຍະຫ່າງທາງສັງຄົມ ແຕ່ຈາກພາບຕົວຈີງຍັງມີຜູ້ຄົນຈາກຫຼາຍສາລະທິດເຂົ້າຮ່ວມສົ່ງ ຫົວໜ້າວົງໜຸ່ມໂກສິນຂຶ້ນໄປເທິງຟ້າ. ທີ່ເສົ້າສຸດແມ່ນທີມງານເພີ່ນເອງ ແລະຄອບຄົວ.

ທີມງານນັກຮ້ອງ ນັກດົນຕຣີ ໜຸ່ມໂກສິນ ບອກວ່າ ເຖິງມື້ນີ້ຈະເປັນມື້ສຸດທ້າຍທີ່ໄດ້ສົ່ງຫົວໜ້າສູ່ສະຫວັນ ແຕ່ທີມງານຈະສານຕໍ່ໄປໃນເສັ້ນທາງທີ່ເພິ່ນໄດ້ປູໄວ້ໃຫ້ ຕ້ອງຂອບໃຈທາງ ອາຈານກິດາວເພັດ ຫລື 3ອ້າຍນ້ອງ ໜູຫ່ວງ, ຂໍໃຫ້ດວງວິນຍານ ຫົວໜ້າຈົ່ງຂື້ນສະຫວັນຊັ້ນຟ້າ ພວກເຮົາຈະຈົດຈຳສິ່ງທີ່ດີງາມໄວ້ຕະຫຼອດໄປ. ອາຈານ ກິດາວເພັດ ໜູຫ່ວງ ໄດ້ຈາກໄປໂດຍບໍ່ມີຫວນຄືນ ເພິ່ນຈາກທຸກຄົນໄປໄວກະທັນຫັນແບບບໍ່ທັນໄດ້ຕັ້ງຕົວ ແຕ່ຜົນງານ ແລະຄຸນງາມຄວາມດີຂອງເພີ່ນນັ້ນ ທຸກຄົນຈະຂໍຈົດຈຳໄປຕະຫຼອດການ. ທ່າມກາງບັນຍາກາດທີ່ທົ່ວສັງຄົມ ພວມປະຕິບັດມາດຕະການຫລີກເວັ້ນພະຍາດໂຄວິດ 19 ແຕ່ຫລາຍວັນຜ່ານມາ, ຄົນໃນວົງການ ຍາດຕິພີ່ນ້ອງ ເພື່ອນມິດສະຫາຍ ແລະ ບັນດາແຟນເພງ.

ໄດ້ຮ່ວມສະແດງຄວາມໄວ້ອາໄລຕໍ່ການຈາກໄປທີ່ບໍ່ມີວັນຫວນກັບຄືນມາຂອງທ່ານ ກິ ດາວເພັດ ໜູຫ່ວງ ໂດຍການໄປຮ່ວມເຄົາລົບສົບ, ກິນທານ ແລະ ສົ່ງຂໍ້ຄວາມເພື່ອແບ່ງເບົາຄວາມທຸກໂສກກັບຄອບຄົວ ແລະ ເປັນການສະແດງເຖິງຄວາມຮັກ ຄວາມອາໄລຍິ່ງ ຕໍ່ສິລະປິນທ່ານນີ້. ເນື່ອງຈາກເພິ່ນບໍ່ເປັນພຽງນັກຮ້ອງ ນັກດົນຕຣີຄົນທຳມະດາເທົ່ານັ້ນ ແຕ່ຍັງເປັນຄູເພງ. ເປັນຜູ້ທີ່ມີອິດທິພົນໃນວົງການບັນເທິງບ້ານເຮົາມາຕະຫຼອດເຖິງວ່າ ອຸດສາຫະກຳເພງ ໄດ້ປ່ຽນໄປຕາມແຕ່ລະຍຸກ ແຕ່ເພງຂອງ ກິ ດາວເພັດ ໜູຫ່ວງ ນັບວ່າເປັນທີ່ຄອງໃຈຂອງແຟນເພງບໍ່ມີປ່ຽນແປງ ນັບແຕ່ໄລຍະອອກເປັນກາແຊັດ, ຍຸກແຜ່ນຊີດີ ແລະ ມາເຖິງຍຸກອັບໂຫລດລົງຢູທູບ ກໍ່ລ້ວນໄດ້ຮັບຄວາມນິຍົມສູງເປັນອັນດັບຕົ້ນໆ ກິ ດາວເພັດ ໜູຫ່ວງ.

ຖືວ່າ ເປັນສິລະປິນທີ່ປະ ສົບຜົນສຳເລັດຜູ້ໜຶ່ງ ມີຜົນງານເພງ ທີ່ສັງຄົມ ນິຍົມຊົມຊອບປະຊາຊົນຮ້ອງໄດ້ແຕ່ເໜືອເຖິງໃຕ້. ທ່ານ ກິ ດາວເພັດ ໜູຫ່ວງ ເກີດເມື່ອວັນທີ 1 ກໍລະກົດ 1972 ທີ່ບ້ານນາວາງ ເມືອງໜອງບົກ ແຂວງຄຳມ່ວນ. ເປັນນ້ອງຊາຍຫລ້າໃນວົງດົນຕີ ໜຸ່ມໂກສິນ ທີ່ມີຊື່ສຽງໃນອະດີດຈົນເຖິງປັດຈຸບັນ ບໍ່ວ່າ ວົງດົນຕີນີ້ຈະໄປຕັ້ງເວທີ ກາງຈ້ອງຢູ່ໃສ ປະຊາຊົນທ້ອງຖິ່ນນັ້ນ ກໍຈະພາກັນໄປຕິດຕາມ ຮ່ວມຮ້ອງເພງ ຟ້ອນລຳວົງ ຢ່າງມ່ວນຊື່ນ.