ເຈົ້າແຂວງຈຳປາສັກລົງຢ້ຽມຢາມນາຍແລະພົນທະຫານເຂດພູຂຽວນິນ

ໃນວັນເສົາທີ​ 11 ມັງກອນ 2020, ທ່ານ​ ປອ ບຸນຖອງ​ ດີວິໄຊ​, ເຈົ້າແຂວງໆຈຳປາສັກ​, ປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ ພ້ອມດ້ວຍຄະນະ ໄດ້ເດີນທາງລົງໄປຢ້ຽມຢາມຖາມຂ່າວຄວາມທຸກ-ສຸກ ພ້ອມທັງມອບຂອງຂັວນ ແລະ ອວຍພອນນາຍ ແລະ ພົນທະຫານທີ່ກໍາລັງປະຕິບັດໜ້າທີ່ຢູ່ຄ້າຍທະຫານຕ່າງໆ ໃນເຂດຫ່າງໄກສອກຫຼີກ(ພູຂຽວນິນ). ໃນໂອກາດການເດີນທາງລົງໄປຢ້ຽມຢາມໃນຄັ້ງນີ້, ທ່ານ ປອ ບຸນຖອງ ດີວິໄຊ,

ເຈົ້າແຂວງໆຈໍາປາສັກ ໄດ້ສະແດງຄວາມຢື້ຢາມຖາມຂ່າວ ແລະ ກ່າວມອບຂັວນກໍາລັງໃຈອັນອົບອຸ່ນໃຫ້ແກ່ນາຍ ແລະ ພົນທະຫານທີ່ພວມປະຕິບັດພາລະໜ້າທີອັນສູງສົ່ງໃນການປ້ອງກັນຊາດ, ປ້ອງກັນຄວາມສະຫງົບ, ພ້ອມທັງອຳນາດອະທິປະໄຕ ແລະ ຜືນແຜນດິນອັນຄົບຖ້ວນຂອງຊາດ ໄວ້ຢ່າງປອດໄພ ແລະ ໝັ່ນຄົງ, ແລະ ທ່ານເອງກໍ່ຍັງສາມາດເຫັນໄດ້ສະພາບຄວາມເປັນຈິງຢູ່ແຕ່ລະກອງບັນຊາການໃນເຂດນີ້ອີກດ້ວຍ. ຈາກນນັ້ນ, ທ່ານເຈົ້າແຂວງກໍ່ໄດ້ມອບເຂົ້າສານອາຫານແຫ້ງຈໍານວນໜື່ງ ພ້ອມທັງກ່າວຄໍາອວຍໄຊໃຫ້ພອນເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ

ຄົບຮອບ 71 ປີ (20 ມັງກອນ 1949 ~ 20 ມັງກອນ 2020 ທີ່ໝູນວຽນມາຄົບຮອບໃນປີນີ້. ຮ່ວມຕິດຕາມເຄື່ອນໄຫວພ້ອມກັບທ່ານເຈົ້າແຂວງໃນຄັ້ງນີ້ຍັງມີ ທ່ານ​ ບົວລິນ ວົງພະຈັນ, ຮອງເຈົ້າແຂວງໆຈຳປາສັກ,ທ່ານ​ ພົນຈັດຕະວາ ສຸໄກ ພິມມະສານ, ຫົວໜ້າການທະຫານກອງບັນຊາການທະຫານແຂວງ,​ ຜູ້ຕາງໜ້າອົງການຈັດຕັ້ງມະຫາຊົນຂອງແຂວງ, ຫົວໜ້າດ່ານພາສີສາກົນວັງເຕົ່າ,​ ​ບໍລິສັດ​ ປາວີນາ ພັດທະນາກະສິກຳຈໍາກັດ, ບໍລີສັດກໍ່ສ້າງຂົວທາງຄົບວົງຈອນຈຳກັດ ແລະ ພາກສ່ວນກ່ຽວຂ້ອງຂອງແຂວງ​ອີກຈໍານວນໜື່ງ. ຂ່າວໂດຍ: ເກດສະໜາ ແກ້ວສຸວັນນະແສງ